يانگي قولايدا «ايل آرمان» نشرياتي آرقالي بير كيچي گؤوروملي، يونه اولي ايچ مضمونلي كتاب چاپ اديليپ يايراديلدي. اول بولسا اؤز قيزغين عصري‌نينگ فرزندي بولان چين شاهيريميز مرحوم آنا‌محمد ساده‌نينگ (82-1337 ش) «گوزلگ» آدينداقي سايلانان قوشغولار كتابي‌دي.
كتاب عبدالقهار صوفي‌راد و آمان‌قليچ شادمهر آرقالي تاييارلانيپدير و قربان صحت هم ابراهيم بدخشان اونگا سوزباشي يازيپديرلار. بو كتاب اساساّ اول مرحوم شاهيرينگ ديري‌ليگينده اوز سسي بيلن چيقاران «گوزلگ» آدلي كاست نواري بويونچا يازيليپ، تاييارلانپدير. اونگا 50-أ قولاي قوشغي سيغديرليپدير؛ 42 رقعي صحيفه‌دا.


بو كتاب اديل شاهيرينگ ادي، گؤوني يالي ساده شكلده چيقارليپدير. اونگا فهرست بريلماندير؛ حتّي سوزلوك قوشولماندير. دييمك شاهيرينگ قوشغولاري، دنياسي ال دگمديك سوي شكلده اوقيجا هودورله‌نيپدير.
گويا دييسنگ اونونگ كاستي‌ني دينگله‌يان يالي. امّا آنا محمد ساده بيلن كوپنگراك تانيش بولماق اوچين اونونگ ترجمه حالي حقدا حتي قيسغاچا-‌دا يازيلان بولسا يارارلي بولجاق‌ميش. انشاءالله بو ايش گلجكده أديلجك
قدم‌لارينگ باشلانغيجي بولار.
ساده دورلي شعر اولچگ‌لرينده گويچلي هم شاهيرانا ديل بيلن دوره‌وي اثر دوره‌ديپدير. اونونگ ساده امّا تويس توركمن ديليني تازه قوشغي‌اوغروندا پيدالانيش يول‌لاري نسخه‌ليق هم گورلده حدينده‌دير. كتابينگ باشيندا بو قوشغولار حقدا شيله گليار:
«اگر بو قوشغولاري باشدان ساوما وظيفه حكمونده اوقاپ گچسنگيز ساده شاهيرينگ ييتيرجك زادي يوق؛ يونه سيزينگ ييتيرن زادينگيز كوپدير.اگر‌ـ‌ده هر بير سوزونه اونس بريپ، هر سطرينه دقّت اديپ هر بير قوشغي‌‌ني دولي اووره‌نيپ بيلسنگيز، اينانينگ! بو دفترينگ يورگيندن سيزينگ قلبينگيزا گونديز ياغار؛ ساويق روحونگيز قيزينار. اونسونگ شاهيرينگ دامارلارينداقي دونگاق قان، سيزينگ يورگينگيزده حركته دوشوپ ديره‌لر. ساده‌نگ روحي سيزينگ روحونگيزدا يوغروليپ هم‌ـ‌ أ شادلانار، هم ـ ده ابديته باغلانار. ساده اولدي دييسه‌لر اينانمانگ. چين شاهيردان اولوم‌لرـ م قاچيغين‌دير. اولار اوز حقيقي اوقيجي‌لاري‌نينگ هر بير ساليميندا قايتالاپ ـ قايتالاپ ياشايانديرلار.»


ساده‌دان ايكي قوشغي

حسرت
سن گيدن گينگ آسمان
من جانا آتش
دووك قاناتلي بر يارالي قوش
سايرايشيم غمگين
سنده قاناتيم قاقيپ بيلمه‌يان
اركيندن اركين
ييلديز گووسونگه باريپ بيلمه‌يان
قولايدان قولاي، ياقيندان ياقين
سن گيدن گينگ آسمان
من جانا آتش
دووك قاناتي بير يارالي قوش


سن بيلن
سن‌بيلن
اندام‌لارينگ دويغورليغي بيلن
گويز گولونده اوقلان چيغ‌لارينگ
گونش نوروني سرپيان گوزلري بيلن
گورله‌شيان
گوزلرينگ باقيشي، لب‌لرينگ آلي
دينگه گوزل‌ليگينگ دارتيشي‌ميقا؟!
ياقين يانيمدا دورقانگ
بيرجيك اويلانمان
يازا، ياغتي‌ليغا اينانيان
كيرپيك‌لرينگ اوقي بيلن
اربت‌ليگه گزليان