آی سولطان مئججیدینگ ایچینه پئناه گئتیرئن آیاللارا یوزلئنیپ شیئله دیدی:
- اورسیات سالداتلاری ، غالانینگ ایچینه گیریپدیرلر. بیزینگ ییگیدلرمیز و مئردانا ارلرمیز دوشمان اوگینده سئوشیارلار . بیزینگ بو یئرده بوقونیپ یاتماغمیزدان پئیدا یوق . یووردی ، نامیسی و دینیمیزی غوراماق اوچون ، سئوشجئنگ لرمیزه یاردام بئرمئلی .
آی سولطان بو سوزدئن سونگ آلتی آیلیق چاغاسینی آرقاسینا آلدیدا یالیغی بیلئن ماکام دانگدی و چالتلیق بیلئن اوینه طاراپ یوزلئندی . اوینده ایکی سانی غارا توپئنگ باردی . آدامسی توپئنگ بیلئن دوشمان سالداتلارینی ، دوزاخا یوللایاردی . آی سولطان باریپ اونینگ اوقدان بوشان توپئنگینی اوقدان دولدیریپ باشلادیدا ، گوزیندئن دومه ، دومه یاش دوکیپ دوران چاغاسینا یوزلئنیپ شئیله دیدی :
- آغلاما بالام . بو زامان ایش واغتیدیر . آغلاماقدان پئیدا یوق . آتانگا سئرائدیپ مئردلیک ائورئن .


شول زامان نیکولای سالدات ، باتیر مئرگئنی گوردی و اونی اولدیرمئک اوچون ، اوینگ داشیندان آیلانیپ ، سیرتقی غاپینی تاپدیدا ، ایچئری گیردی.
مئرگئن ، آیالی آی سولطانینگ دولدیران توپئنگینی نوباتلاین آلیپ دوشمانلار بیلئن سئوشیاردی .
سالدات مئرگئنینگ سیرتیندان باردیدا ، نیشانا آلیپ ، آتیپ غویبردی . اوق مئرگئنینگ آرقاسیندان گیریپ غورساغیندان چیقیپ گیددی .
آی سولطان ائوریلدیدا سالداتی گوردی . ائلینداکی یانگی دولدیران توپئنگی بیلئن سالداتی آتیپ غویبردی . سالدات دونگدئرلیپ گیددی .
آی سولطان اوزینی ، آدامسینا یئتردی . باتیر مئرگئنینگ کئلله سینی دیزینینگ اوستینده غویدی . آدامسی شهیدلر سانینا غوشیلیپدی .
آی سولطانینگ دئپه سیندئن داغ غویلان یالی بولدی . یورئگی غیسیلیپ ، گوزی غارانگقی لادی . گویشلی دوشمانینگ اونگینده یئکه غالیپدی . آی سولطان گوزیندئن دوکیلئن یاشینی سوپیردیدا . چاغاسینا یوزلئنیپ شئیله دیدی :
- بالام ، آتانگ غانی ناحاق دوکیلدی . اونینگ اوجینی آلماق اوچون بیز دیری غالمالی . گئل بو یئردئن گیدئیلی .
آی سولطان توپئنگلری دولدیردی و آدامسینینگ خانجارینی بیلینه باغلاپ ، یئرده غانا بولاشیپ یاتان باتیر مئرگئنه سونگقی گئزئک سئرئددی و اوینگ سیرتقی غاپیسیندان چیقیپ گیددی.
***
آلتمیش ییلدان سونگرا
ایکینجی دونیا اورشیدی . گئرمانیانینگ غوشونی لنینگرادی باسیپ آلماق اوچون ، بو شهره گئلیپدی . بیرلئشئن ساویت یووردلرینیگ غوشونی جان آیامان لنینگرادی ساقلاماق اوچون آلادا ائدیاردی . لنینگراد شهری یئر بیلئن یگسان بولوپدی. کئسل خانالار ، یارالی سالداتلاردان دولیدی . لوقمان غیزلاری ، دوکتورلار بیلئن سالداتلاری تیمار لاماق اوچون تاقاللا بارینی ائدیاردیلار .
کئسل خانا اونگینده دئوطالاپ تازه گئلئن دوکتورلار ماشیندان دوشدیلر و اوزلرینی کئسل خانا یئتیریپ سالداتلاری باقیپ باشلادیلار.
دوکتورلار بیری اوز کاردئشینی شیئله چاغیردی. دوکتور صالیخ بو یئره گئلینگ .
دوکتور صالیخ اوزینی اورس سالداتینا یئتردی و اونی باقدی . اول یاش ییگیددی و یالواریجی گوزلر بیلئن صالیخا سئرائدیاردی . صالیخ ائنه سینینگ میداما دییان سوزلری یادینا دوشدی . اول شئیله دییاردی :
- آتانگ غانی ناحاق یئرده یاتماسین . اونینگ اوجینی اورسلاردان آلارسینگ .
صالیخ اورس سالداتینا سئرائددیدا اوز یانیندان شئیله دیدی :
- ائنه غوی مئردلیک بیزدئن و ناماردلیق دوشماندان یادیگار غالسین .
دوکتور صالیخ اورس سالداتینینگ یاراسینی بئجئریپ باشلادی .
مدیریت وبلاگ غوشغیلار
غایرالی